बीड नगर परिषद अतिक्रमण पथकावर कारवाई करा –द युवा ग्रामीण पत्रकार संघ आक्रमक

 बीड : बीड शहरातील नगर परिषदेच्या अतिक्रमण विभागाकडून करण्यात आलेल्या कारवाईदरम्यान एका महिला भाजी विक्रेत्यासोबत अमानवी व अयोग्य वर्तन झाल्याचा आरोप करण्यात आला असून, या प्रकरणाची सखोल चौकशी करून संबंधित अधिकारी व कर्मचाऱ्यांवर कठोर कारवाई करण्याची मागणी युवा ग्रामीण पत्रकार संघाने केली आहे.

संघाचे संस्थापक अध्यक्ष अन्सार शेख यांनी जिल्हाधिकाऱ्यांकडे लेखी तक्रार सादर केली असल्याचे सांगितले जाते. कारवाईदरम्यान महिला कर्मचाऱ्यांची उपस्थिती होती का, संबंधित नियमांचे पालन झाले का आणि मानवी हक्कांचे उल्लंघन झाले का याची चौकशी व्हावी अशी मागणी करण्यात आली आहे.

तसेच संबंधित महिलेला न्याय न मिळाल्यास प्रकरण उच्च न्यायालय तसेच संबंधित आयोगांकडे नेण्याचा इशाराही देण्यात आला आहे. कारवाईच्या वेळी उपस्थित अधिकारी, कर्मचाऱ्यांचे जबाब, व्हिडिओ व इतर पुरावे तपासून निष्पक्ष निर्णय घेण्याची मागणी संघटनेकडून करण्यात आली आहे.

या प्रकरणामुळे स्थानिक स्तरावर चर्चा सुरू असून प्रशासनाने तातडीने दखल घेऊन योग्य ती कार्यवाही करावी, अशी मागणी नागरिकांकडूनही व्यक्त होत आहे.